हेटौडा महोत्सव- गुणगान गाउने पत्रकार बाहेक अरुलाई प्रवेश निषेध

हेटौडा खबर बुधबार, २०८२ चैत्र ११, २१ :२१ बजे

हेटौडामा जारी महोत्सवमा महोत्सवको गुणगान गाउने पत्रकारहरुले मात्र प्रवेश पाउने गरेको पाइएको छ।

उद्योग तथा पर्यटन प्रवर्द्धन गर्ने उद्देश्यका साथ आयोजना गरिएको भनिएको महोत्सवको चौतर्फी विरोध हुन थालेपछि आयोजक मिडियामाथि खनिएको हो। महोत्सवमा आयोजक र महोत्सवका बारे गुणगान गाउने पत्रकार र राम्रा समाचार बनाउने मिडिया हाउसलाई मात्र प्रवेश गराउने गरेको छ।

महोत्सवमा प्रवेश गर्दा सञ्चारकर्मीहरूलाई भित्र जान प्रवेश छैन भन्दै आयोजकले परिचालन गरेका व्यक्तिहरुले रोक्ने गरेका छन्। कुन संचारकर्मी हो र महोत्सवका बारे राम्रो समाचार लेख्ने पत्रकार हो या होइन हेरेर मात्र आयोजकले प्रवेश दिने गरेको एक सञ्चारकर्मीले बताए । त्यसो त केही दिन अघि हेटौडाका पत्रकार रमेश बन्जारालाई फोटो तथा भिडियो कैद गर्ने क्रममा आयोजक द्वारा परिचालित व्यक्तिहरूले गुण्डागर्दी शैलीमा प्रस्तुत हुँदै बन्जारालाई दुर्व्यवहार समेत गरेका थिए।

त्यसयता महोत्सवका बारे रिपोर्टिङ गर्न पुगेका अन्य पत्रकारहरुलाई समेत आयोजकले प्रवेश निषेध गरेको छ । महोत्सवमा उठाइएको चर्को शुल्क कानुन विपरीतका गतिविधिहरु समाचार बन्ने डरले महोत्सवमै पत्रकारलाई आयोजकले प्रवेश निषेध गरेको हो ।

महोत्सवका विषयमा नराम्रा समाचार नलेख्ने र गुणगान गाउने सञ्चारकर्मीलाई आयोजकले सजिलै प्रवेश दिने र फोटो तथा भिडियो कैद गर्न दिने गरेको छ।

यस विषयमा नेपाल पत्रकार महासंघ मकवानपुर शाखा भने मौन बसेको छ। सार्वजनिक स्थानमा फोटो तथा भिडियो कैद र रिपोर्टिङ गर्न असहज परिस्थिति बने पनि यस विषयमा महासंघले कुनै पनि धारणा सार्वजनिक गरेको छैन।

आयोजकले सन्चारकर्मीलाई सहयोगीको रुपमा लिनुपर्नेमा बाधक सोचेर पटक पटक दुव्र्यवहार गर्नु गलत भएको महासंघ मकवानपुरकि उपाध्यक्ष भावना रिजालको प्रतिक्रिया छ ।

आयोजकले महोत्सवमा मनलाग्दी शुल्क उठाएको प्रवेश शुल्कमा हरेक दिन फेरबदल गर्ने गरेको मनलाग्दी गैरकानुनी ढङ्गबाट पार्किङ शुल्क उठाउने गरेको विषयमा चौतर्फी विरोध भइरहेको छ। तर यस विषयमा स्थानीय सरकार हेटौडा उपमहानगरपालिका र जिल्ला प्रशासन कार्यालय मौन बसेको छ।