हेटौंडा सडक विस्तार- राज्यले माग्दा बिना मुआब्जा भत्काउने भनि घरधनीले गरेका थिए मन्जुरीनामा
पहिले राज्यले चाहेको खण्डमा दिन तयार भनि सहिछाप, अहिले राज्यविरुद्ध मुद्धा दायर
![](https://ap-south-1.linodeobjects.com/hetauda/2023/08/hetauda-bajar-manjurinama.jpg)
एसियाली विकास बैंक एडीबीको सहयोग अन्तर्गतको एसियन हाइवेमा पर्ने हेटौंडा बजार क्षेत्रको त्रिभुवन राजपथ र महेन्द्र राजमार्गको सडक वर्षौंदेखि विस्तार हुन सकेको छैन ।
२०७३ सालमा त्यतिबेलाका क्षेत्रिय प्रशासक विनोद केसीको अगुवाइमा २०७३ सालमा हेटौंडा सडक विस्तार कार्य सुरु भएको थियो । हेटौंडाको राप्तिरोडदेखि डोजर चल्न सुरुभएपछी बजार क्षेत्रका केही घरधनीले अदालतमा मुद्धा दायर गरेर स्टे अर्डर लिएपछि सडक विस्तार कार्य रोकियो । त्यसपछी पटक-पटक डिभिजन सडक कार्यालयले सुचना निकाल्यो । तर विस्तार कार्य अगाडी बढेन । पछिल्लो पटक गत १० असारमा ३५ दिने म्याददिदै पुनः राजमार्गको २५/२५ गज सडक सिमा भित्र पर्ने संरचना हटाउन सडक डिभिजनले सुचना निकालेको थियो ।
पुनः यहाँका घरधनिले सर्वोच्च अदालतमा रिट निवेदन दिएपछी पुनः सडक विस्तार कार्य प्रभावित बनेको छ । तर हेटौंडामा राजमार्गमा पर्ने घरधनीले आवस्यक परेका बेला घर भत्काउन तयार छौं भनि मञ्जुरीनाम गरेको भेटिएको छ ।
हेटौँडा उपमहानगरपालिकाको राजमार्ग क्षेत्रमा बनेका घरधनीहरुले तत्कालीन समयमा राज्यले चाहेको बखत संरचना भत्काइदिने कबुलियतनामा गर्ने घरधनीले हाल सडक विस्तारका बेला सर्वोच्चमा मुद्दा दायर गरेको पाइएको हो ।
विभिन्न मितिमा घर, व्यवसायिक भवनलगायतका अन्य व्यवसायिक प्रयोजनका संरचनाको नक्सा पास गर्दा हेटौँडा उपमहानगरपालिका (तत्कालीननगर पञ्चायत र नगरपालिका)मा राज्यले चाहेको बखत निर्माण गरिएका संरचना हटाइदिने भनि हेटौंडाका घरधनीले कबुलियतनामा गरेका थिए ।
यो हेर्नुहोस्
यसरी कबुलियतनामा गर्नेमा करिब ३ सय वटा घरधुरी रहेको बुझिएको छ । कतिपयले नक्सा पास नै नगरेकाले उनीहरुको कबुलियतनामा छैन ।उपमहानगरपालिकासँग २ सय ९८ जनाले राज्यले चाहेको बेला सडक सीमा क्षेत्रमा बनेका संरचना हटाइदिने सहमति गरेको कबुलियतनामा सुरक्षित रहेको छ । कबुलियतनामा गर्दा घरधनीहरुको कित्ता नम्बर, सडक ऐनले तोकेको सडक अधिकार क्षेत्रको नापजाँच, सडक विस्तार हुँदा छोड्नु पर्ने क्षेत्रफल स्पष्टसँग तोकिएको छ । घरधनीहरुले राज्यले सडक विस्तार गर्दा आफूले बनाएको संरचना स्वयम आफैंले भत्काइदिने कबोलसमेत गरेका छन् ।
सडक अधिकार क्षेत्र र सेटब्याक सम्बन्धी कबुलियतनामा सम्बन्धित घरधनीहरुले हस्ताक्षर र औंठा छाप लगाएको देखिन्छ । औंठा छापसहितको कबुलियतनामा गर्नेमा राज्यको प्रमुख अहोदामा पुगेका राजनीतिज्ञदेखि निजी क्षेत्रको ठूलो संस्था मकवानपुर उद्योग वाणिज्य संघलगायतका निकायमा नेतृत्वदायी भूमिका निर्वाह गरेका व्यक्तित्वहरु रहेका छन । घरधनीहरुले कबुलियतनामा मुआब्जा माग गरेर ‘कहीँ कतै कुनै उजुरबाजुर’ नगर्ने सर्तसहित नक्सा पास लिएका छन् ।
यसमा बागमती प्रदेशका पुर्व मेयर डोरमणि पौडेल पनि पर्छन् । ४ नम्बर वडास्थित स्कुलरोडको मुखैमा पर्ने घर महेन्द्र राजमार्गको सडक अधिकार क्षेत्र अतिक्रमण गरेर बनाइएको कबुलियतनामाबाट खुल्छ । उक्त घर उनका छोरा नवीन पौडेलको नाममा छ । उनले पनि राज्यले चाहेको बखत संरचना आफैं भत्काएर कतै उजुरबाजुर नगर्ने सर्तमा मञ्जुर हुँदै कबुलियतनामामा हस्ताक्षर र औंठा छाप लगाएका छन् ।
हेटौँडा उपमहानगरपालिकाको रातोमाटेदेखि राप्तिपुलसम्मराष्ट्रिय राजमार्गमा पर्ने अतिक्रमित संरचना हटाएर सडक विस्तार गर्ने सडक डिभिजन हेटौँडाको सूचनाको ३५ दिने म्याद १५ साउनबाट सकिएको छ । तर, सडक विस्तार कार्य अगाडि बढ्न सकेको छैन् । राजमार्ग क्षेत्रमा रहेका घरधनीले मुवाब्जा माग्दै सर्वोच्च अदालतमा मुद्दा दायर गरेपछि सडक विस्तार कार्य अगाडि बढ्न नसकेको हो ।
हेटौँडा उपमहानगरपालिका–१०, राप्तिरोड निवासी विजयलाल जोशीसमेतले दायर गरेको रिटमा सर्वोच्च अदालतका न्यायधीश अनिलकुमार सिन्हाको एकल इजलाशले गत मंगलबार अल्पकालीन आदेश जारी गरेको थियो । मुद्दा दायर गर्ने उनै जोशीले पनि राज्यले चाहेको बेला संरचना भत्काइदिने र कतै उजुरबाजुर नगर्ने कबुलियतनामा गरेको कागजात उपमहानगरपालिकासँग सुरक्षित छ । ‘विजयलाल जोशीज्यूले कबुलियतनामा गर्नु भएको छ । उहाँको मुद्दाले हामी सर्वोच्च अदालतमा पुगेका छौं । उहाँको कबुलियतनामा पनि सर्वोच्चले २१ गतेको पेशीमा हेर्नेछ ।,’ उपमहानगर स्रोतले भनेको छ ।
जोशीसमेतले दायर गरेको रिट उपर अल्पकालीन आदेश जारी गर्दै १६ साउनमा सडक डिभिजन, हेटौँडा उपमहानगरपालिकालगायतका सरकारी निकायलाई छलफलका लागि बोलाएको थियो । १६ गते मुद्दाको कारवाही नभएपछी पेशी साउन २१ गतेका लागि सरेको छ ।
क्याटेगोरी : मुख्य खबर, समाचार, स्थानिय
ट्याग : #२५ मिटर सडक विस्तार, #मकवानपुर, #सडक डिभिजन हेटौंडा, #सडक विस्तार, #हेटौंडा, #हेटौंडा उपमहानगरपालिका, #हेटौंडा सडक विस्तार
प्रतिक्रिया