मकवानपुरमा लघुवित्तको आतंकले महिलाहरुको उठिबास
परिवारलाई नै दिनहुँ धम्की दिने गरेको पिडितको गुनासो
लघुवित्तबाट ऋण लिएर दैनिक जीवन सहज बनाउने लक्ष्य लिएका मकवानपुरका महिलाहरु ऋणकै कारण समस्यमा परेका छन् । लघुवित्तको चर्को ब्याज र घुमाउरो अशुली प्रक्रियाका कारण सामान्य ऋणकै कारण कतिको घरबार गएको छ, कतिको डिभोर्स भएको भने कति लघुवित्तकै कारणले उठिबास लागेर जंगलमा छाप्रो हालेर बस्न बाध्य भएका छन् । लघुवित्तकै कारण बस्ने नसक्ने अवस्था सृजना भएपछि महिलाहरु सडक संघर्षमै उत्रन बाध्य बनेका छन् ।
हेटौंडामा आज लघुवित्तबाट पीडतहरुले जिल्ला प्रशासन कार्यालयसमेत घेराउ गरे । मकवानपुरमा मात्र पाँचसय बढि लघुवित्तबाट पीडत महिलाहरु लघुवितीय संस्था संघर्ष समितिको सम्पर्कमा आइसकेका छन् । तीमध्येका एक हुन्, मकवानपुरको बागमती गाउँपालिका ७ की माया योन्जन । साधना माइक्रोफाइनान्सबाट एक वर्ष अघि दुई लाख रुपैयाँ ऋण लिएकोमा उक्त ऋण तिर्न नसक्दा फाइनान्सले घर लिलामी गरेको छ । उनको परिवार जंगलमा झुपडी हालेर बसेको छ ।
उनीजस्ता सयौं महिलाहरु अहिले मानसिक र आर्थिक तनावमा छन् । परिवार र लघुबित्तको दवाबका कारण धेरै महिलाहरु पीडित भएका छन् । स्वतस्फुर्त पीडित महिलाहरुले मंगलबार हेटौंडामा र्याली निकालेका छन् । उनीहरुले लघुवित्तीय संस्थाहरु खारेजी, त्यस्ता संस्थाबाट लिइएको सामुहिक ऋण मिनाहाको माग गरेका छन् ।
हेटौंडा १३ की उर्मिला बिकले तीन लाख ४५ हजार ऋण लिएकोमा तीन लाख २० हजार तिर्दा समेत तीन लाख ८५ हजार ऋण बाँकी छ । उनीहरुको घर जग्गा लिलामी गर्ने भन्दै लघुवित्तले दैनिक धम्की दिने गरेको छ । मकवानपुरकै सोममाया घलानको पनि उस्तै पिडा छ । लघुवित्तले दिएको मानसिक तनाबका कारण उनि धेरैपटक आत्महत्याको प्रयास पनि गरिन् । दिनहुँको धम्कि सहन नसकेर घरमा सम्बन्ध विच्छेदसम्मको कुरा सहनुपरेको छ उनले ।
बागमती प्रदेशभित्र करिब तीन लघुवित्त पीडित सम्पर्कमा रहेको संघर्ष समितिले जनाएको छ । देशभर ३३ लाख लघुवित्त पीडित रहेको अनुमान छ । उनीहरुले लघुवित्तको ज्यादती बिरुद्ध आन्दोलन थालेका हुन् ।
लघुवित्तको ऋण असुली प्रणाली र दवाबका कारण धेरै महिलाहरुले मानसिक तनाव ब्यहोरेको र कतिपयले आत्महत्या समेत गरिसकेका छन् ।विशेषगरी लघुवित्तहरुले सुरुमा अनेक प्रलोभन र आश्वासन देखाउने र समुह बनाइ ऋण दिने र ऋण तिर्न नसकेपछि महिलाका गरगहना र गोठमा भएका वस्तु नै लगिदिनेसम्मको हर्कत गरेको विभिन्न जिल्लाका लघुवित्तका पिडितहरु बताउँछन ।
राष्ट्र बैंकका अनुसार गत आर्थिक मसान्तसम्म ७७ वटै जिल्लामा लघुवित्त संस्थाहरुको सेवा पुगेको छ । पहुँचमा विस्तार हुँदा करिब ५९ लाख घरपरिवारले लघुवित्त सेवा लिएका छन । तीमध्ये करिब ९७ प्रतिशत महिला छन । यस्तै, करिब ३३ लाख ३१ हजार ऋणीले लघु कर्जा लिएका छन । ऋणीमध्ये पनि करिब ९७ प्रतिशत महिला छन । तर ग्रामिण क्षेत्रमा ठुलो समस्याको रुपमा देखिएको लघुवित्त संस्थाको आतंकले उग्ररुप लिँदा लाखौँको घरबार उठिबास लागेको छ तर यस बारे सरकार भने अझैसम्म मौन रहेको छ ।
प्रकाशित मिति : मङ्लबार, २०७९ फाल्गुन १६, २१ :०० बजे
ट्याग : #आतंक, #जिल्ला प्रशासन मकवानपुर, #मकवानपुर, #लघुवित्त
लेखकको बारेमा
प्रतिक्रिया