मुख्यमन्त्री शालिकराम जम्मकट्टेलले चैत ८ गते विश्वासको मत लिने
बागमती प्रदेशका मुख्यमन्त्री शालिकराम जम्मकट्टेलले चैत ८ गते विश्वासको मत लिने भएका छन् । सरकारलाई साथ दिएको राष्ट्रिय प्रजातन्त्र पार्टी बाहिरीएकाले उनले पुनः बिस्वासको मत लिन लागेका हुन् राप्रपाले १३ फागनुमा सरकारलाई दिएको समर्थन फिर्ता लिएको थियो ।
विश्वासको मत लिएपछि सरकार विस्तार गर्ने तयारीमा मुख्यमन्त्री जम्मकट्टेल रहेका छन् । मुख्यमन्त्री जम्मकट्टेलले संविधानकाे धारा १८८ काे उपधारा (२) तथा बागमती प्रदेशसभा नियमावली २०७४ काे नियम १४३ काे उपनियम १ बमाेजिम बागमती प्रदेशसभामा विश्वासकाे मत लिन प्रदेशसभा सचिवालयलाई पत्र लेखेका छन् ।
२५ पुसमा नेकपा एमाले, नेकपा माओवादी केन्द्र र राप्रपाको समर्थनमा जम्मकट्टेल मुख्यमन्त्री बनेका थिए । सरकारलाई नेकपा (एकीकृत समाजवादी) र हाम्राे नेपाली पार्टीले समर्थन गरे पनि मुख्यमन्त्री जम्मकट्टेलले सरकारमा सहभागी भने गराएका थिएनन् । जम्मकट्टेलले यसअघि ३ माघमा विश्वासकाे मत लिएका थिए । बागमती प्रदेश सरकारको वर्तमान मन्त्रिपरिषद्मा माओवादी केन्द्र र एमालेका मात्रै मन्त्री रहेका छन् ।
उनलाई यसअघि १ सय १० सदस्यीय प्रदेशसभा बैठकमा उपस्थितमध्ये १०५ सांसदले विश्वासको मत दिएका थिए । नेपाल मजदुर किसान पार्टीका तीन सांसदले विपक्षमा मत हालेका थिए भने एक जना सांसद अनुपस्थित भएका थिए ।
क्याटेगोरी : मुख्य खबर, समाचार, स्थानिय
प्रतिक्रिया