मनहरीमा हात्तीको आक्रमणबाट एक महिला घाइते, लामिटार पोष्ट तोडफोड
जंगली हात्तीको आक्रमणबाट मकवानपुरको मनहरीमा एक वृद्धा घाइते भएकी छन् । मनहरी गाउँपालिका–४ मसिनेमा सोमबार बिहान करेसाबारीमा काम गरिरहेकी ६४ वर्षीय राधा अधिकारीलाई हात्तीले आक्रमण गरेको हो । घाइते अधिकारीको हेटौंडा–११ स्थित चुरेहिल अस्पतालमा उपचार भइरहेको छ ।
हात्तीले वृद्धालाई आक्रमण गरेसँगै आक्रोशित स्थानीयले मनहरी गाउँपालिका–३, लामिटारस्थित पर्सा राष्ट्रिय निकुञ्जको लामिटार पोष्टमा तोडफोड गरेका छन् । हात्ती नियन्त्रणमा बेवास्ता गरेको भन्दै नेपाली सेनाले प्रयोग गर्दै आएको गाडी, कार्यालय र गोलघरमा तोडफोड गरेका हुन् ।
केही दिन अघिदेखि मनहरी गाउँपालिकाको क्षेत्रमा जंगली हात्तीले आतंक फैलाएको थियो । आइतबार साँझबाट मनहरी मसिने क्षेत्रमा हात्ती देखा परेको थियो । यसअघि पनि सो क्षेत्रमा हात्तीको आक्रमणबाट एक वृद्धाको मृत्यु भएको थियो ।
हात्तीको आक्रमणबाट घाइते भएकी अधिकारीको सम्पूर्ण उपचारमा मनहरी गाउँपालिकाले सहयोग गर्ने गाउँपालिका अध्यक्ष रंजन कालाखेतीले बताएका छन् । हात्तीका कारण यहाँका स्थानीय बर्षेनी समस्यामा पर्ने गरेको र मृत्युनै हुनेगरेकाले निकुन्जले तुरुन्त यसबारे चासो दिएर नियन्त्रण गर्नुपर्ने उनको भनाइ छ ।
क्याटेगोरी : मुख्य खबर, समाचार, स्थानिय
प्रतिक्रिया