बानियाँ-बहादुर युद्ध उत्कर्षमा, सहमति तोडे विश्वासको मत नदिने राजिनामा दिने
बागमती प्रदेशमा भर्खरै नियुक्त भएका मुख्यमन्त्री इन्द्र बहादुर बानियाँ र निवर्तमान मुख्यमन्त्री बहादुर सिंह लामा विचको किचलो अझै टुंगिएको छैन ।
अविश्वासको प्रस्तावपछी सत्ताच्युत भएपनि राजिनामा नदिने अडान लिएका बहादुर अन्तत कांग्रेस सभापति शेर बहादुर देउवासामु प्रदेशमा पावर सेयरिङ हुनेगरी आफ्नो पक्षका सांसदलाई मन्त्री पद दिनेलगायतका विषयमा सहमति भएपछी राजिनामा दिएका थिए । तर बानियाँ मुख्यमन्त्री बनेपछि पहिले गरेको सहमति लत्याएको भन्दै उनलाई विश्वासको मत दिनेबेला सहयोग नगर्ने बहादुर पक्षका सांसदको तयारी छ ।
नयाँ मुख्यमन्त्री बानियाँले यही साउन २७ गते विश्वासको मत लिने कार्यसूची छ । तर, लामालाई पदबाट राजीनामा दिन लगाउँदा राखेका सर्त बानियाँले पूरा नगरेको भन्दै बहादुर पक्षका १४ जना सांसद रुष्ट छन् । आफ्नै सरकारका मुख्यमन्त्रीलाई किक आउट हानेर आफु मुख्यमन्त्री बनेका बानियाँ यति बेला आफ्नै पार्टीका सांसदबाट विश्वास जित्न नसक्ने अवस्थामा देखिएका छन् ।
हुनत कांग्रेस र एमालेले मुख्यमन्त्रीका लागि विश्वासको मत दिन ह्विप नै जारी गरिसकेका छन् तर रुष्ट रहेका कांग्रेस सांसदहरुले सहमति कार्यान्यन नभए ‘ह्विप’लाई ‘स्विप’ हानेर सामुहिक राजिनामा दिने सम्मको तयारी गरेको स्रोतले बताएको छ ।
राजिनामा अघि बहादुरले नियुक्त गरेका ३ जना मन्त्रीलाई बानियाँले नियुक्त गरी मन्त्रालय बाडफाड गरिनुपर्ने बहादुर पक्षको मूल माग छ । लामाले प्रदेशसभा सदस्यहरू गोविन्द लम्साललाई आन्तरिक मामिला तथा कानुन, माया श्रेष्ठ र गीता गुरुङलाई बिनाविभागीय मन्त्री नियुक्त गरेका थिए । प्रदेश प्रमुख कार्यालयले मन्त्रीहरूको शपथका लागि सूचना निकालिसकेपछि प्रदेश प्रमुख दीपकप्रसाद देवकोटा उपचारका लागि भन्दै काठमाडौं आएपछि शपथ रोकिएको थियो । लामाले मुख्यमन्त्री पदबाट राजीनामा दिन ती व्यक्तिहरूलाई नयाँ मन्त्रिपरिषद्मा स्थान सुरक्षित हुनुपर्ने सर्त राखेका थिए । पहिले बानियाँले पनि सर्त मन्जुर रहेको छलफलमा बताएका थिए, तर अहिले पहिलेको सहमतिलाई बानियाँले लत्याएको आरोप बहादुर पक्षको छ ।
लामा समुहले आफ्ना एजेन्डामा सहमति नगरे बानियाँले साउन २७ गते लिने भनिएको विश्वासको मतमा देखाइदिने भन्दै आन्तरिक तयारी थालेका छन् । बानियाँले २७ गते विस्वासको मत लिने लक्ष सहित आफ्ना समुहमा रहेका सांसदलाई पद वितरण गरिरहेका छन् । बानियाँ समुहमा रहेका २२ जना मध्ये कृष्ण तामाङ र शिवराज अधिकारीलाई मन्त्री, मिन कृष्ण महर्जनलाई संसदीय दलको सचिव, सुरजचन्द्र लामिछानेलाई प्रवक्ता र कन्चनचन्द्र वादेलाई प्रमुख सचेतक बनाएर सेटल गरेका छन् भने मन्त्री बन्ने लाईनमा देखिएकी बिन्दु रायमाझी पौडेललाई अनुशासन समिति तिर पठाएका छन् ।
आफ्नै समूहका सांसदलाई पद बाढीरहदा बहादुर पक्षका ३ सांसदलाई भने मन्त्री बनाउन चासो नदेखाएपछी विश्वासको मत नदिने निर्णयमा पुगेका बहादुर पक्षका सांसदले सामुहिक राजिमाना समेत लिएर बसेका छन् । उनिहरुका अनुसार केन्द्रीय सभापतिलाई भेटेर कुरा राख्ने र पहिले गरिएको सहमतिमा बानियाँ नगए ह्विप नमान्ने र सामुहिक राजिनामा दिने तयारी छ ।
बागमती प्रदेश सभामा ११० जना सांसद रहेका छन भने बानियाँ सरकार टिकाउनको लागि ५६ सांसदको विस्वासको मत आवस्यक पर्दछ । लामा समूहका १४ सांसदले विस्वासको मत नदिए बानियाँ सरकार एक सातामै ढल्नेछ ।
क्याटेगोरी : मुख्य खबर, समाचार, स्थानिय
प्रतिक्रिया