देउवालाई समेत नटेरेपछी मुख्यमन्त्रीको पद ‘चैट’ हुँदै, बानियाँ बलियो दाबेदार

हेटौडा खबर शुक्रबार, २०८२ साउन ९, १७ :२७ बजे

बागमती प्रदेश सरकार फेरबदल हुने भएको छ । मुख्यमन्त्री बहादुर सिंह लामाले राजीनामा नदिएपछि उनलाई कांग्रेस संसदीय दलको नेताबाट हटाउने तयारी भएको छ ।

लामाविरुद्ध कांग्रेस संसदीय दलका २१ सांसदको हस्ताक्षरसहित शुक्रबार संसदीय दलमा अविश्वास प्रस्ताव दर्ता गरिएको छ । २१ सांसदको हस्ताक्षरसहित संसदीय दलका सचिव कृष्ण कुमार तामाङलाई हस्ताक्षर बुझिएको हो ।

बागमतीमा कांग्रेसको तर्फबाट मन्त्री बनेका ४ जना मन्त्रीले आजै राजीनामा दिएका थिए । राजीनामा दिनेहरुमा युवा तथा खेलकुद मन्त्री मिनकृष्ण महर्जन, आन्तरिक मामिला तथा कानुनमन्त्री सुरजचन्द्र लामिछाने, संस्कृति तथा पर्यटन मन्त्री विमल ठकुरी र सहकारी तथा गरिबी निवारणमन्त्री मधुकुमार श्रेष्ठ रहेका छन्।

मुख्यमन्त्री लामाको कार्यसम्पादन र बजेटको विषयमा विवाद चुलिएपछि लामालाई हटाउनु पर्ने आवाज उठेको थियो । काङ्ग्रेस सभापति शेर बहादुर देउवाले समेत लामालाई राजीनामा दिन भएका थिए । राजीनामाको विषयमा लामाले आलटाल गरेर बसेका थिए ।

प्रदेशमा मुख्यमन्त्रीमा नेपाली कांग्रेसका बागमती प्रदेश सभापति इन्द्र बहादुर बानियाँलाई केन्द्रीय सभापति देउवाले ग्रीन सिग्नल दिइसकेका छन् । सोही अनुरुप बानियाँ अघि बढीसकेका छन् । अर्कोतर्फ कांग्रेस सहमहामन्त्री महालक्ष्मी उपाध्याय डिना पक्षका रामकृष्ण चित्रकारलाई अघि सार्ने तयारी थियो । तर यसमा डिनाको समेत केहिसिप नचलेको स्रोतले बताएको छ । अब संसदीय दलको नेतामा इन्द्र बहादुर बानियाँको संभावना थप बलियो बनेको छ, जसले गर्दा मुख्यमन्त्री उनै बन्ने सम्भावना छ ।

हाल प्रदेश सभामा कांग्रेसको तर्फबाट ३७ जना रहेका छन्। संसदीय दलका नेतामाथि अविश्वासको प्रस्ताव पेश गरी पारित हुन ५० भन्दा बढी प्रतिशत सदस्य चाहिन्छ । त्यो भनेको १९ जना सांसद हो । यदि अहिलेकै अवस्था कायम रहे प्रस्ताव पारित हुन बहुमत पुगिसकेको छ । यदि ५० भन्दा बढी प्रतिशतले अविश्वासको प्रस्तावमा राजी भइरहे तत्कालै मुख्यमन्त्री लामाको पद च्युत हुनेछ ।