हेटौंडाको सूचना प्रविधि मेलाको इज्जत जोगाउने तासिर स्कुलका विद्यार्थीको मेहेनत

हेटौडा खबर सोमवार, २०७९ चैत्र ६, १३ :२७ बजे

कम्प्युटर एशोसिएशन नेपाल महासंघ मकवानपुर (क्यान मकवानपुर) को आयोजनामा प्रदेश स्तरीय क्यान इन्फो–टेक (सूचना प्रविधि) मेला हेटौंडाको रोयल पार्टी प्यालेसमा पांच दिन सम्म चल्यो ।

आयोजकका अनुसार गत २ चैतदेखि चलेको मेलामा ३६ वटा स्टल राखिएको छ ।

क्यान मकवानपुरको कमजोर तयारी र समन्वय अभावका कारण प्रदेश राजधानीमा जारी सूचना प्रविधि मेला नाम मात्रको मेला बन्यो।

सूचना, प्रविधि र मनोरञ्जनको क्षेत्रमा जनचेतना अभिवृद्धि गर्दै प्रविधिमैत्री जनशक्ति निर्माण र आइटी क्षेत्रको नयाँ प्रविधिलाई उजागर गर्ने उद्देश्यले क्यानले मेला आयोजना गर्ने गर्छ तर हेटौंडामा भने क्यान असफल भयो ।

हेटौंडामा भएको सूचना प्रविधि मेला क्यान इन्फोटेक कर्मकाण्ड पूरा गर्नको लागि मात्रै आयोजना गरिएको देखिएको छ । धेरै वर्षदेखि सूचना तथा सञ्चार प्रविधि क्षेत्रमा विकास भएका नयाँ–नयाँ प्रविधि प्रदर्शनी हुने भनि अपेक्षा गरिएको मेलामा प्रिन्टर र केहि अन्य सामान भन्दा अन्य कुनै नयाँ प्रविधिको प्रदर्शनी देखिएको छैन। तर बागमती प्रदेश स्तरीय सूचना प्रविधि मेलाको इज्जत भने हेटौंडाको एक विद्यालयको विद्यार्थीको मेहेनतले जोगाएको छ ।

हेटौंडाको तासिर इन्गीलिश माध्यमिक विद्यालयका विद्यार्थीहरुले बनाएको विभिन्न प्रविधि प्रदर्शनी मेलाकै आकर्षक बन्यो । विद्यालयका ७, ८, र ९ कक्षाका विद्यार्थीले बनाएको रिवन काट्ने रोबोर्ट मेशिन, ड्रोन, अण्डाबाट चल्ला काड्ने ह्याचिंग मेशिनलगायतमा सामाग्री उत्कृष्ट थिए । प्रदर्शनीमा कक्षा ७ का समर्पण चौलागाईंले आफुहरुले बनाएका सामाग्रीबारे जानकारी दिएका थिए ।

जे होस् बागमती प्रदेश स्तरीय सुचना प्रविधि मेलामा अन्य कुनै सामग्रीको अवलोकन गर्न नपाएपनि तासिर स्कुलका विद्यार्थीको क्षमता भने स्पष्ट झल्किएको थियो ।