नेपाली कांग्रेस बागमती प्रदेश संसदीयदलको निर्वाचनमा हालका मुख्यमन्त्री बहादुर सिंह लामा र इन्द्र बहादुर बानियाँ बीच भिडन्त हुने भएको छ।
मुख्यमन्त्री लामालाई अविश्वासको प्रस्ताव पेश गरेका बानियाँले आज मत विभाजन हुँदा उनले लामालाई पछि पार्दै २२ सांसदको साथ पाएर अविश्वासको प्रस्ताव पारित गराउन सफल भएका थिए।
दलको नेतामाथि अविश्वासको प्रस्ताव पारित भइसकेपछि अब निर्वाचन प्रक्रियामा जाँदा हालका मुख्यमन्त्री लामा र बानियाँबीच प्रतिस्पर्धा हुने पक्का भएको छ। लामा समूहबाट बहादुर सिंह लामा नै उम्मेदवार बन्ने उनी निकट स्रोतले जनाएको छ ।
अर्कोतर्फ बानियाँ समूहबाट बानियाँ नै उम्मेदवार रहनेछन्। संसदीय दलको निर्वाचन भोलि हुने कार्यतालिका रहेको छ। २०७९ पौष १३ गते संसदीय दलमा इन्द्रबहादुर बानियाँलाई हराउँदै लामा दलको नेतामा निर्वाचित बनेका थिए। पुनः भोलि लामा र बानियाँ बीच संसदीय दलमा भिडन्त हुने भएको छ ।
यता संसदीय दलमा जे भएपनि मुख्यमन्त्री पद भने नछोड्ने लामाले अडान लिएर बसेका छन्। अर्कोतर्फ बानियाँले भने नैतिकताका आधारमा मार्ग प्रशस्त गर्न लामालाई सुझाएका छन्।
प्रकाशित मिति : मङ्लबार, २०८२ साउन १३, २२ :३७ बजे
लेखकको बारेमा
प्रतिक्रिया