छोरी बलात्कार गरेको घटना लुकाउन बुबाले नै गरे छोराको हत्या
बहिनी बलात्कृत भएको थाहा पाएपछि बाबुविरुद्ध जाहेरी दिँदा बाबुले नै छोराको हत्या गरेको प्रहरीको प्रारम्भिक अनुसन्धानबाट खुलेको छ । सोमबार बन्चरोले हानेको अवस्थामा २१ वर्षीय युवकको शव सुर्खेतको पञ्चपुरी नगरपालिका–५ मा फेला परेको थियो । जिल्ला प्रहरी कार्यालयमा कात्तिकमा आफ्नै छोरीलाई बलात्कार गरेको भन्दै छोराले आफ्नै बाबुविरुद्ध जाहेरी दिएका थिए ।
प्रहरीमा छोराले जाहेरी दिएको थाहा पाएपछि बुबा फरार भएका थिए । जिल्ला प्रहरी कार्यालय सुर्खेतका प्रमुख प्रहरी उपरीक्षक योगेन्द्रसिंह थापाका अनुसार पीडित किशोरीले बुबा नै आएर दाजुको हत्या गरेको दाबी गरेकी छन् । रातिको घटना भएकाले विस्तृत अनुसन्धान भइरहको प्रहरी उपरीक्षक थापाले बताए । युवकको हत्यामा उनकै बाबु संलग्न रहेको प्रमाणहरू फेला परेको पनि दाबी गरिएको छ ।
‘पारिवारिक मनमुटावका कारण हत्या भएको देखिन्छ,’ उपरीक्षक थापाले भने । अनुसन्धानमा संलग्न प्रहरी अधिकृतका अनुसार हत्या योजनाबद्ध रूपमा भएको छ । गत असोज २७ गते १९ वर्षीया किशोरीलाई बलात्कार गरेको भन्दै प्रहरीमा जाहेरी परेको थियो । मामाघर बस्दै आएकी छोरी बुबा भारतबाट घर फर्केपछि भेट्न बोलाएर बलात्कार गरेको जाहेरीमा उल्लेख छ ।
आफू बाबुबाट बलात्कृत भएको किशोरीले दाइलाई भनेकी थिइन् । दाइले गत कात्तिक १५ गते जिल्ला प्रहरी कार्यकाल सुर्खेतमा बुबाविरुद्ध जबरजस्ती करणीको जाहेरी दिएका थिए । बुबाले छोरीलाई मुद्दा नहाल्न भन्दै धम्की दिएका थिए। मुद्दा परेपछि उनी श्रीमतीसहित भागेर भारत पसेका थिए ।
पीडित किशोरीले भारतमा लुकेर बसेका बुबाले नै नेपाल आएर दाजुको हत्या गरेर भागेको दाबी गरेकी छन् । ‘प्रहरीको अनुसन्धानमा जनवरीको १२ र १३ तारिखमा भारतबाट नेपालमा आएको खुलेको छ । १४ मा नेपाल पुगेर १५ तारिख राति हत्या गरेर भागेको हुनसक्छ,ु अनुसन्धान खटिएका एक अधिकृतले भने, ‘बुबामाथि शंका गर्ने आधारहरू भेटिँदै गएका छन् ।’
पीडित किशोरीले आफूलाई बलात्कार गरेको घटनाले बुबा र दाजुबीच विवाद बढेको बयान दिएकी छ ।
क्याटेगोरी : समाचार
प्रतिक्रिया